Thirumazhisaialwar_Thiruchandaviruththam

திருக் கச்சி நம்பி அருளிச் செய்த தனியன்

தருச்சந்த பொழில் தழுவு தாரணியின் துயர் தீர ^*

திருச்சந்த விருத்தம் செய் திரு மழிசைப் பரன் வருமூர் ^*

கருச்சந்தும் காரகிலும் கமழ் கோங்கும் மண நாறும் ^*

திருச்சந்ததுடன் மருவு திருமழிசை வளம் பதியே

திருக் கச்சி நம்பி அருளிச் செய்த தனியன்

உலகும் மழிசையும் உள் உணர்ந்து ^* தம்மில்

புலவர் புகழ் கோலால் தூக்க ^* உலகு தன்னை

வைத்தெடுத்த பக்கத்தும் ^* மா நீர் மழிசையே

வைத்தெடுத்த பக்கம் வலிது

பூநிலாய வைந்துமாய்ப் புனற்கண்நின்ற நான்குமாய் ^*

தீநிலாய மூன்றுமாய்ச் சிறந்தகா லிரண்டுமாய் ^*

மீநிலாய தொன்றுமாகி வேறுவேறு தன்மையாய் ^*

நீநிலாய வண்ணநின்னை யார்நினைக்க வல்லரே

ஆறுமாறு மாறுமா யோரைந்துமைந்து மைந்துமாய் ^*

ஏறுசீரி ரண்டுமூன்று மேழுமாறு மெட்டுமாய் ^*

வேறுவேறு ஞானமாகி மெய்யினொடு பொய்யுமாய் ^*

ஊறொடோசை யாயவைந்து மாய ஆய மாயனே

ஐந்துமைந்து மைந்துமாகி யல்லவற்று ளாயுமாய் ^*

ஐந்துமூன்று மொன்றுமாகி நின்றவாதி தேவனே ^*

ஐந்துமைந்து மைந்துமாகி யந்தரத்த ணைந்துநின்று ^*

ஐந்துமைந்து மாயநின்னை யாவர்காண வல்லரே

மூன்றுமுப்ப தாறினோடொ ரைந்துமைந்து மைந்துமாய் ^*

மூன்றுமூர்த்தி யாகிமூன்று மூன்றுமூன்று மூன்றுமாய் ^*

தோன்றுசோதி மூன்றுமாய்த் துளக்கமில் விளக்கமாய் ^*

ஏன்றெனாவி யுள்புகுந்த தென்கொலோவெம் மீசனே

நின்றியங்கு மொன்றலாவு ருக்கடோறும் ஆவியாய் ^*

ஒன்றியுள்க லந்துநின்ற நின்னதன்மை யின்னதென்று ^*

என்றும்யார்க்கு மெண்ணிறந்த ஆதியாய்நின் னுந்திவாய் ^*

அன்றுநான்மு கற்பயந்த வாதிதேவ னல்லையே